ਕਾਲੇ ਕਾਲੇ ਮੇਘ ਅਕਾਸ਼ੀਂ ਛਾਏ ਨੇ

*****ਗ਼ਜ਼ਲ**** ਮਿਤੀ: 18.04.25 ਮੌਸਮ ਨੇ ਅੱਜ ਵੱਖਰੇ ਰੰਗ ਵਿਖਾਏ ਨੇ, ਕਾਲੇ ਕਾਲੇ ਮੇਘ ਅਕਾਸ਼ੀਂ ਛਾਏ ਨੇ। ਯਾਦਾਂ ਦੇ ਪਰਛਾਵੇਂ ਘੇਰਾ ਪਾ ਲੈਂਦੇ, ਜਦ ਵੀ ਤੇਰੇ ਸੁਪਨੇ ਸਾਨੂੰ ਆਏ ਨੇ। ਸਾਡੇ ਵਿਹੜੇ ਆਕੇ ਨੰਨ੍ਹੇ ਬੱਚਿਆਂ ਨੇ, ਘਰ ਦੇ ਸਾਰੇ ਕੋਨੇ ਹੀ ਮਹਿਕਾਏ ਨੇ। ਜਦ ਵੀ ਤੁਰਦੇ ਹਾਂ ਅਣਜਾਣੇ ਰਾਹਾਂ ਤੇ, ਉਸ ਪਲ ਸਾਨੂੰ ਚੇਤੇ ਤੇਰੇ ਆਏ ਨੇ। ਸਾਵਣ ਦੇ ਛਰਾਟੇ ਵੀ ਮਨ ਨੂੰ ਭਾਉਂਦੇ ਨਾ, ਦਿਲ ਦੇ ਵਿਹੜੇ ਵਿੱਚ ਸੰਨਾਟੇ ਛਾਏ ਨੇ। ਚੰਨ ਸਿਤਾਰੇ ਕਰਨ ਤੇਰੀਆਂ ਹੀ ਗੱਲਾਂ, ਹਵਾਵਾਂ ਨੇ ਅੱਜ ਤੇਰੇ ਗੀਤ ਸੁਣਾਏ ਨੇ। ਜੋ ਵੀ ਰੋਸੇ ਸ਼ਿਕਵੇ ਅੜਿਆ ਤੇਰੇ ਤੇ , ਆਪਾਂ ਤਾਂ ਉਹ ਸਾਰੇ ਆਖ ਸੁਣਾਏ ਨੇ। ਹਰ ਪਲ ਮੰਗਾਂ ਸੁੱਖ ਤੇਰੀ ਮੈਂ ਕਾਦਰ ਤੋਂ, ਤੇਰੇ ਨਾਂ ਦੇ ਦੀਪ "ਕਲੇਰ" ਜਗਾਏ ਨੇ। ਪਰਮਿੰਦਰ ਕੌਰ ਕਲੇਰ