बाप-माय चेतs

बेटा-बेटी पर जरी रखs धयान। रखs खोल के अप्पन आँख अउ कान।। नै तो तोर इज्जत मिलतो धुरी में। तोरा जिए पड़तो बड़ मजबूरी में।। कुछ समय बाल-बच्चा संग बिताबs। ओकरा अपने पास बैठ पढ़ाबs।। संसकार के सभे बात समझाबs। गलत-सही के ओकरा गुर सिखाबs।। घर के मरजादा के बात बताबs। निम्मन-निम्मन धार्मिक कथा सुनाबs।। रामायन-गीता के कहs पढ़ेला। राम नियन ओकरा कह दs रहेला।। रखे भाव परेम सभे परिवार से। ई सीखलाबs बुतरू के प्यार से।। पति-पतनी उकटा पुरान नै करिहs। आपस में ओकर आगे नै लड़िहs। बुतरून पर कलह से गलत परभाव। जइतो बदल ओकरा अलगे सुभाव।। अप्पने रहबs मोबाइल चलइते। लइकन के नै देखबs का करइथे।। तो बिगड़बे करतो तोहर सनतान। नहियें बनतो ऊ सही के इनसान।। नरेंद्र के बतिया के बान्ह लs गाठ। नै तो लोर बहत तोरा आठ आठ।। नरेंद्र सिंह, अतरी 28.05.2025