Main Bas Nahi Keh Paya.

Mujhe nahi pata yeh kya hai… Tere saath baat karna, Roz... bina kisi wajah ke baat karna, Wo chhoti-chhoti baatein, Jinmein kabhi main hansta hoon… Aur kabhi chup ho jaata hoon. Tu keh jaati hai sab kuch… Apne dil ki baatein, apne jazbaat, Aur main... main sirf sunta hoon. Ek aise insaan ki tarah, Jiske paas sab kuch kehne ko hai — Par keh nahi paata... "kyuki main thak chuka hoon… bharosa karte-karte..". Mujhe darr lagta hai, Jab koi meri taraf pyaar se dekhta hai. Mujhe shak hone lagta hai, Jab koi kehta hai "main samajhti hoon". Kya karoon? Jab pichle kuch rishte sirf lafzon ke the, Aur vaadon mein khaali-pan tha… Ab jab tu saamne hoti hai, Toh dil kuch aur mehsoos karta hai, Par zubaan... wo kabhi uss raaste tak jaati hi nahi. Main tere kareeb hoon, Par ek deewar hai... Jo main khud ne khadi ki hai, Taaki khud ko bacha saku… Tu takra bhi jaaye, Toh main tootne na paun… Tu puchhegi — “Main important hoon ya nahi?” Toh sach yeh hai — Tu sirf important nahi... Tu meri khamoshiyon ka sabab hai. Par… Main waisa insaan nahi ban paaya, Jo khud pe, ya kisi aur pe dobara bharosa kar sake. Bas isiliye… Main kabhi kuch keh nahi paya.