"Is Baar Nahi (Part 2)"

Woh phir se aayi thi lafzon ka sahara lekar, Jaise kuch bhi na badla ho beech ke faaslon mein। Jaise dard sirf ek kahani tha, Aur main ab bhi wahi hoon uski yaadon mein। Dil ne phir halka sa darwaza khatkhataya, “Shayad iss baar sach mein badal gayi ho…” Par dimag ne dheere se haath rok liya, “Yaad hai na, tu pehle bhi yahi sochta tha?” Raaton ke woh bechain pal yaad aaye, Jab neend bhi uska naam le kar toot jaati thi। Aur subah ka woh khali pan, Jahan har cheez adhuri si lag jaati thi। “Tu phir wahi raasta chune ja raha hai?” Dimag ne sawal uthaya, teekha par sachha। “Jahan khud ko kho diya tha tune, Kisi aur ko paane ke chakkar mein achha?” Dil ab bhi uski awaaz pe pighalna chahta tha, Par iss baar zameer beech mein aa gaya। Kehne laga — “pyaar tabhi tak khoobsurat hai, Jab tak khud se dushmani na ban jaaye।” Toh maine usse nahi, khud ko jawab diya — “Main wapas nahi aaunga us mod pe, Jahan se toot ke aaya tha main…” Is baar dard ko jeetne nahi dunga, Is baar main khud ko haarne nahi dunga। Is baar… sach mein nahi.