Ek Adhoora Pyar

Jiske saath main apni poori zindagi bitana chahti thi, Jise dil se apnana chahti thi, Usse sach mein bepanah pyaar kiya, Lekin meri baaton par usne kabhi bharosa nahi kiya. Shayad meri berukhi ke peeche chhupa mera pyaar, Usse kabhi dikh hi nahi paaya. Main toh sirf usse paane ke liye ladti thi, Jab bhi kisi aur ke saath dekhti thi, toh andar se jal jaati thi. Jab bhi poochhti — "Main teri kya lagti hoon?" Toh har baar wahi thanda jawab — "Pata nahi." Kabhi kabhi itna apnapan deta, Lagta jaise bas main hi uski duniya hoon. Aur kabhi itna paraya kar deta, Jaise main uske liye hawaa se zyada kuch nahi. Par sach toh yeh hai, Woh dil se ek masoom bachcha tha, Aur main us masoomiyat se, Apni saari zid ke saath pyaar karti thi. Ek baar usne mera haath thaama tha, Aur maine woh haath apne hothon se chhoo liya tha. Woh pal mere liye poori duniya jaisa tha, Jaise meri har dua sun li gayi ho. Bas ek baar, usse apni baahon mein bharna chahti thi, Uski dhadkane apne seene mein mehsoos karna chahti thi, Par us din ke baad, woh meri duniya se door hota gaya. Aaj bhi nahi pata main uski kya thi, Ek dost, ek pagal deewani ya sirf ek paheli? Par itna zaroor jaanti hoon — Mera pyaar aaj bhi utna hi hai, jitna us din tha.